ब्रेकिंग

भीमनगर रहिवाशांचा ‘बिर्‍हाड’ मोर्चा

Wrutuja pandharpure
25 May 2025

पुणे : एरंडवणा भागातील भीमनगर वसाहतीच्या पुनर्वसनामध्ये बिल्डरकडून फसवणूक झाल्याचा आरोप आहे. त्यामुळे न्याय मिळवण्यासाठी राज्याचे उच्च व तंत्रशिक्षण मंत्री चंद्रकांत पाटील यांच्या कार्यालयावर शनिवारी भीमनगर रहिवाशी यांचा बिर्‍हाड

मोर्चा धडकला.

रिपब्लिकन युवा मोर्चाचे राहुल डंबाळे यांच्या नेतृत्वाखाली निघालेल्या या बिर्‍हाड मोर्चात देविदास ओव्हाळ, जावेद शेख, हरी बागडे, सुनिल डमरे, दादू गायकवाड, सुदाम शिंदे, उमा साठे, स्नेहल गायकवाड, रेश्मा पल्ला, रईसा शेख, निशिकांत पोळ, प्रतीक डंबाळे, प्रभू सुनगर, सिकंदर मुलाणी यांच्यासह बहुसंख्येने स्थानिक रहिवासी सहभागी झाले होते. भीमनगर येथील २१६ कुटुंबीयांचे झोपडपट्टी पुनर्वसन प्राधिकरण मार्फत पुनर्वसन करण्याचा बोगस प्रस्ताव भक्ती एंटरप्राइजेसमार्फत दाखल करण्यात आलेला आहे. या संदर्भामध्ये यापूर्वीच बिल्डरसह २० जणांविरुद्ध कोथरूड पोलिस ठाणे येथे फसवणूक व इतर कलमान्वये गुन्हा दाखल करण्यात आलेला आहे. तसेच, या योजनेच्या मंजुरीसाठी स्थानिक मूळ रहिवाशांऐवजी बाहेरची बोगस लाभार्थी तयार करण्याचा गंभीर प्रकार बिल्डरकडून करण्यात आलेला आहे. त्याद्वारे स्थानिक नागरिकांना भीमनगरपासून सुमारे नऊ किलोमीटर अंतरावर सक्तीने पुनर्वसन करण्याचा घाट सध्या बिल्डरने झोपडपट्टी पुनर्वसन प्राधिकारणामार्फत घातलेला आहे.